聖誕無野做

今日係聖誕節,跟往年一樣,唔會慶祝,屋企亦唔會擺任何聖誕飾物. 自從94年之後,聖誕節對我已經全無意義, 但又唔關老公事架,所以只會同佢食餐飯算.

唸住今日去Everland,因為10,000入場券優惠去到年底,但係佢琴日踩單車,仲係去玩MTB,返屋企時見到佢個樣...我面都青埋.  點解隻眼又腫又流眼水咁架?! 成個人又好似散左咁!! 但係我再仔細D睇佢,我就狂笑,因為佢個樣好滑稽. 佢同我講佢咁傷法已經係玩MTB傷得最輕既程度黎架喇,咁又係,你又無甩皮甩骨咁返黎. 佢仲同我講,最衰係前面個阿豬媽突然剎車,佢未停唔切囉~ 我呢個正義之士(對佢黎講係衰老婆),就同佢講: 你又唔好賴人,咁你做咩跟咁貼呀? 開車都唔好跟太貼啦,何況單車人撞人?!

哈哈,激到佢痛多兩錢. 我真係好衰. 但我又唔會變態到要你陪我去Everland. 二黎又太凍, 我都頂唔住. 所以你成日都話想食Sizzler, 今晚就就你一次啦~

兩年三撞車 ~ 係被人撞

琴日下午老公返屋企食飯時,神色好凝重咁,
老公 : 唉,個業主...
我(插咀) : 吓?? 加租呀?
老公 : 唔係...
我(又插咀) : 吓? 死左?? (我咁估唔出奇,因為我以為佢講緊租office既業主,佢年紀都有番咁上下)
老公 : 嘩~你因住人地聽到呀~ (哦,原來你講緊租屋既業主...)
老公 : 佢撞左我地架車.
我 : (心唸) 呵~ 咁都無咁驚,起碼人地保險公司會賠.
老公 : 呀~佢都幾有良心架喎,打電話話我知~
我: 梗係啦,樓下裝左cctv架嘛,佢唔驚你老婆我打鑼緝兇呀?!

唉,我地架車,第3次俾人撞.

第1次,俾個賤精hit & run, 唸起都火滾,呢條友呢世都唔駛旨意有運行, 撞到個bumper d 漆甩哂,要自己 um 荷包俾 300,000 won 換左佢.

第2次,過左幾個月,車住2部單車唸住去踩單車,條路鬼咁塞, 行兩步停三步咁,就係咁俾後面架車撞左. 其實佢係撞到部單車,單車再挖花部車,個司機第一個反應係驚撞爛部單車,因為分分鐘賠多過架車,放心,我地唔係專業,唔需要咁貴既單車,雖然係咁咋喎,我部單車有名堂架~ 叫cheap cheap bike~ 個司機都幾好人,佢同老公講數既時候我就係車度等,佢地傾完後個司機特登走上黎同我躹躬兼道歉,攪到我唔好意思,一時間唔知俾咩反應佢,淨係同佢講唔緊要~

琴日,就係第3次囉~ 多謝保險公司500,000 won

講開部單車,火都黎, 舊年4月,老公返黎食晚飯,見我係屋企,就同我講佢部單車唔見左(因為佢以為我攞左部單車去踩). 吓?? 邊個死賤種偷左??  佢真係有備而偷,老公部單車係黑色,佢就踩住架黑色殘單車黎,踩老公部走,部殘車就 pat係屋企樓下.

我個部偷左就話無人要啫,老公個部,哼,去二手單車鋪搵下睇下有無~ 都偷鬼左,就食埋飯先去報警, 警車黎到樓下,俾張form老公填,自己同自己落口供,填完就帶個警察睇下環境,睇下部殘單車,同佢講發現左裝剪鉗既膠袋~

無幾耐,科學鑑證黎左,套指模套唔到,佢話一係就係細路做既,一係就係佢帶住手套,咁樣,又無啦啦破財.

最抵死係一個禮拜後,個世紀賤精返黎攞番佢個單車seat...

BBQ Chicken

上星期六去左2個 outlet, 都係o係市區裡面, 老公買左一件褸用黎o係冬天時踩單車,而我就想買條裡面係fleece 既褲, 但係搵唔到o岩既,終於都要上網買,嘩~outlet既價錢,我上網可以買到2條. 今日到手,試穿完即刻洗乾淨,等今個禮拜去Everland著.

買唔到野無咩心機添,哈哈,呢種感覺好耐都無,以前係香港返工時每次行街都要買到野先安落,而家呢邊都無野好買,所以呢覺感覺都唔見左.

晚餐唔想食韓國野,就簡簡單單食BBQ Chicken,又係老公帶我去. 先黎個燒雞先,呢個係原味,先食雞脾,好嫩滑喎,不過雞皮燒得唔夠,其他部位就乾左D囉, 同埋可能叫辣味會好食D...

再叫個Cheese Quesadillas, 中間係honey,都唔夾既,味道又寡左D,俾我會加D辣,茄醬,雞肉 or ham 咁啦, 第2日去超市買左tortilla番屋企,遲d買埋其他材料試下整先.

BBQ 豬肉

今日同公司既同事一齊食飯,最主要係因為我地既秘書小姐영이做埋呢個月尾就要走喇, 要去澳洲working holiday. 老公而家頭痛緊點樣請人,又係既,要請一個好似佢咁幫得手,做野又無甩甩漏漏既人真係唔容易. 唔好理喇,食左先算,請人呢家野...應該係請o岩人呢家野,可遇不可求...都係個句,食左先算, wahaha!!!

今日去呢間之前老公介紹既BBQ豬肉,佢話好食到無得彈, 好! 就等我呢個小食神去試下先~

呢間野有五花腩,豬頸肉,肋骨揀,但係每樣最少係2人份 (400g), 無得一樣一份,如果淨係同老公黎就只可以揀到一樣,揀兩樣唔係唔得,不過一定食唔哂. 況且佢鐘意食五花腩,而我就鐘意食豬頸肉,兩個鐘意d野都唔埋欄既,實打餐死啦~

今日人多,可以兩樣叫哂, 佢地燒到9成熟先上檯,好呀,o岩哂我d心急既人,又凍又餓,拿拿林啦喂~

d肉全部厚切,咁先有o趙頭架麻. 食舊豬頸肉先, 嘩~ 彈牙到呢, 又新鮮喎~再試五花腩, 好食好食,d皮燒耐少少會脆卜卜,正~

老豆,我唸你會鐘意食個豬頸肉,同你係濟州食既黑豬有得揮呀,你快d黎試啦. 如果我同老公去,我實會輸係佢既魔大頭之下,佢實叫五花腩,你黎就會同我同一陣線,打低魔大頭

唯一既缺點係佢唔係網燒,所以唔可以直接燒走d肥膏,所以食落口幾油膩.

豬肉好食,連d配菜都好食呀,呢個湯,材料簡單,只係大豆芽同泡菜,但又出奇地好味噃,添左3碗.

食完,唔少得coffee & cake, 呢杯 latte唔算平,成8,000won杯,不過又幾好飲.

choco cheese tart, 又係唔錯啦~

係人定係鬼,佢都睇唔出

好幾年前,冬天有一晚,瞓瞓下覺俾露台既水聲嘈醒,初時以為落雨,但唸唸下冬天無理由落到咁大雨,好似開大水喉咁既聲,於是走出露台睇睇,嘩~個boiler神左,係咁標水,就真係好似開左水喉咁.

o個時個人其實仲係半夢半醒狀態,入番屋走去坐係床邊,用好低沉既聲,好慢既節拍叫醒老公:
喂~~起~身~喇~

佢擰轉身,依稀聽到佢叫左一聲 '嚇~' 據佢第二朝既形容,佢當時見到既情景係:

有個長頭髮既女人,dump低頭,仲要著埋件白色裙,坐係床邊唔郁...

佢仲叫我以後唔好咁樣叫醒佢...

啊~咁...我下次用紅藥水畫多兩行鼻血,點睇??

----------------------------------------------------------------------------------

第二日,即call人上屋企check個boiler,仲擔心緊呢晚無熱水沖涼,無暖氣...韓國人效率真係快,幾個鐘後有人黎.

佢有佢check,我有我睇HK drama, 佢知我係中國人,仲同我講普通話,話佢自己下個月去北京學普通話~

佢修理完後,我問左佢個問題: 其實個boiler會唔會爆炸架?

佢答我話唔會,因為有保險掣之類...

hmm...我問呢個問題係未好白痴呢, 但係我又真係機械白痴黎架喎~

我唸佢地驚會漏煤氣多d,事關煤氣公司每年都會有2次上門check有無漏煤氣...

Lotte Premium Outlet

呢個outlet o係12月2日開幕,韓國既outlet都唔係我杯茶,因為三個字 - 殘舊亂. 唔殘唔舊都唔攞出黎賣.

但係冬天又有邊度好去呢? 江原道? 先兩日落完大雪,有雪既地方唔想去噃; 向南行? 要開成兩三個鐘車先去得一個景點...費事..

唯有去outlet當旅行...

勁多人勁多車,去到要排大半個鐘先入到停車場, 仲有100米就到停車場入口時,隔離線架車想打尖,好彩outlet既工作人員見到即刻撲上黎唔俾佢cut; 好喇,到停車場入口,到我地入時,隔離又有架車想cut入黎,嘩~今次勢係假,排得咁辛苦你一個唔該想入黎?! 死唔讓佢,老公bu佢, 蝦~ bu 你一次你再褪入一次, 老公於是猛bu佢喇, 最攪野係連後面架車都睇唔過眼,幫手bu, 兩架車夾攻, 個賤佬終於走左~

outlet都幾大下,分兩邊.

金浦 Lotte Mall

今日老公夜晚成班男人去年尾party,我就變相成日都唔駛煮飯,一個人,好,就去金浦新開既Lotte Mall,今日正式開張...

食完午飯,就展開個人長征之旅. 好耐都無搭地鐵,都莫講話新開既9號線,哈哈~大鄉里出城咁, 9號線好新好靚呀,成程地鐵WIFI又行得順,抵讚!

向2號出口行,有指示牌教去Lotte Mall,真係轉個彎就到.

入面都幾大,幾舒服,鋪哂地墊,都算係全韓國最靚既mall囉,格局有少少少少似香港. 有uniqlo, H&M, ZARA, 10x10, errrr,,唔記得咁多添~

南漢山城 - 晚飯 - 산채정식

周圍視察下睇下食咩,雖然想食肉,但係呢兩個禮拜食得太多喇,都係食菜好d,揀左呢間食'山菜定食'.

中間碟豆腐幾好味,比香港既豆腐實d,我幾鐘意食呢隻,有豆香,豆既比例多過水,感覺真材實料d~
\

南漢山城

趁仲未凍得交關,快d行下山先. 今次係第2次黎,上次黎淨係食個飯就走...

一落車,嘩~好凍呀個頭都ok,隻手就好快變左冰手...

向南門走...至和門

Everland 10,000won 入場

嘩嘩嘩 !! 大發現

Everland入場券只係10,000won咋, 平時去半價.

老公返屋企時我即刻話佢知, 佢即刻答:去咯~ 去咯~
估唔到佢又會同我一齊癲喎~哈哈 好野

等我擇個日子先

大方送 sample

夏天既時候,呢邊既太陽特別猛,要幾個鐘補一次防曬先掂,但係化左妝點搽上面呢,所以就買左sun powder喇,就係最右面既細細罐.

而左面3支野,係送架,初初接上手,一時間分唔出邊支係主人婆,邊支先係妹仔...

光州 - Day 2 - 鴨湯

第二朝,先去醫院睇奶奶,然後去二哥鋪頭攞泡菜,跟住就去食午飯.

必去既鴨湯...每次去光州都一定食,如果無時間食,就會外賣帶返屋企食.

떡갈비

星期六,返鄉下探奶奶...

朝早10:30出發,勁塞車,太陽落山都未去到...終於,坐左8個鐘車先去到.

韓國燒牛肉

去完超市,到食飯時間 ,因為今日最後一日燒牛肉7折,所以勁勁多人. 排左成9個字先輪到我地.

先黎前菜, 酸味味既青爪

韓國拉麵,午餐肉

睇完碗碗碟碟,又到掃超市時間.

男人...始終鐘意食無益既野...

睇完碗碗碟碟,又到掃超市時間.

男人...始終鐘意食無益既野...

一, 拉麵. 呢隻手打麵係我地兩公婆一致認為最好食既拉麵. 老公係Times Square 間Emart見到就拿拿林靜雞雞放入架推車到,俾錢時我先發覺,仲大條道理話: 呢隻牌子而家好難搵呀,唔係間間有架.

你咁講,我邊好意思 say no呀~

又到聖誕~ 又到聖誕~

今日去左 Times Square, 每次都會必去 Modern House, 因為鐘意睇碗碗碟碟...

門口就已經有棵聖誕樹.

又引我...

琴日老公又同人地去踩單車,我自己就係屋企enjoy下,晚飯...蘋果雪梨湯,好好飲呀,今次用左半隻雞煲,好出味,好過用豬腱煲.
夜晚7點幾,隻佬打電話俾我...

老公 : 你食左飯未呀?
我    :  食左啦... (咁好死,突登打黎問我食左飯未??)
老公 : 我而家食緊飯呀...你知唔知我食咩呀??
我    : 咁你食咩鴉? (一定有野,如果唔係點會食緊飯都放低筷子打俾我...)
老公 : 我食緊燒豬肉,好好食呀,非一般好食呀...下次同你一齊黎食呀.
我(心唸) : 衰野,知你啦,無啦啦打黎, 原來係引我...
我 : 咁你影張相俾我睇過.
老公 : 影左喇~

唉~唔睇由自可,一睇...唔好豬既我見到都想食, 豬肉切得厚厚既,我鐘意,因為出面食既通常都係切片,無咬勁...

佢仲話d豬肉係新鮮豬肉,唔係雪藏架,所以又得別彈牙嚼勁...

俾你咁講,仲得了?? 係韓國食既新鮮豬同雪藏豬真係好大分別架,好食好多架.
睇到我直頭想即刻去食啦,但係唔得啦,今日約左去食牛,係呀,30% off既牛,最後一日,今日唔食,唔通加番價先食咁笨咩?! 我呢d精明師奶仔黎架嘛~

鮮淮山煎餅

星期二晚去超市,又係掃一周貨大行動...

見到鮮淮山,平時都要成6,70蚊500g,而家半價,因為之前一直未整過,所以都無買過, 但係一下子又唔知用咩材料一齊煲湯好,唔理喇,咁平,買番去先算.

返屋企上網睇人地點煲,通常都係紅蘿蔔,栗子,粟米,豬腱咁...
oh~神馬都未有...又費事落街買.
咁睇下韓國食譜點整啦,韓國菜最簡單,又唔駛咩配料,嗱起手屋企都有既.

咦?!呢個得,淨係要부침가루(煎餅用既粉)就攪掂.

首先將鮮淮山去皮洗乾淨,用攪拌機攪爛. 再撈埋부침가루同鹽.

韓國首爾遊 - Day 5

Date:15 Nov 2011

今朝又係9點接佢地,食完麵包早餐,就起程去南山. 

我地停係山腰,都唔記得係未停係南山圖書館,然後就行上山. 

嘩~ 好靚呀, 仲要分開紅還紅,黃還黃,掃樹葉都掃得咁有心機,又有唸頭. 人地老闆,識做啦~

韓國首爾遊 - Day 2

Date: 12 Nov 2011

今朝9點接佢地,琴晚講開佢想試韓國番薯,咁o岩屋企仲有幾個,就帶埋柿,黑豆奶,蛋俾佢地當早餐. 姑姐居然話好懷念我呢日整俾佢既早餐,特別係番薯. 我仲教佢點焗番薯,唔駛落水,費事整到d番薯濕淋淋.

第1站去北村韓屋村,行過三清洞,仲有幾棵有葉既銀杏樹,快d影番張先. 但係,原來d銀杏樹真係好臭架,好似坑渠傳出黎d臭味咁.

燒牛肉

11-15日,姑姐姑丈由加拿大返香港探親,中途停左韓國順路玩玩. 其中3日佢地去左濟州, 剩番2日(其實都係得大半日)就我帶佢地周圍睇下逛下.

頭一晚到左都成5點幾,check-in後出街行一個圈到左食飯時間,就車佢地食牛肉.

叫左一客韓牛+兩客醃好既牛肉,佢地好鐘意食個牛呀,咁又真係幾好食既,唔係都唔會帶佢地黎呢度.反而個韓牛就韌左d,可能我燒到全熟掛...

coffee & cake

今日約左朋友食午飯,食完例必去嘆番個cake & coffee, 咁多間coffee shop 最好味就係呢間,d cake 又好味, 今次試下個新款, brownie cheese cake,兩種都鐘意食,二合為一, 岩哂我...哎呀,好想食埋佢既 dark chocolate cheese cake 同埋  chocolate mousse cake添~

兩個口水怪傾到唔知時間...要行快兩步返屋企煮飯俾老細食...

韓國柿

上星期三,收到大伯寄黎既柿, 一箱54個,一日食2個計,食成個月. 呢幾日天氣唔係好凍,相信擺唔夠1個月已經變林柿,或者變爛,要快d食,即係一日要食2個以上...熱底都變寒底...OMG!!

蘋果雪梨湯

秋天,乾燥,滋潤...就會唸起蘋果雪梨湯. 

一個大雪梨,蘋果,2粒蜜棗,雪耳,豬骨,最後加杞子. 

洗乾淨所有材料,擲哂落個煲到,又唔駛點睇火,o岩哂我...

呢排雪梨當造,密密煲先~