韓國千年銀杏樹 - 龍門寺

Date: 26 Oct 2013 (Sat)

呢日去左龍門寺睇千年既銀杏樹, 都幾多人去, 又塞車, 個幾鐘既車程, 11點幾出發, 差唔多成3點先去到 (不過中途我地去左食晏).

嘩~ 入口已經好黃喇~ 不過好得意, 右排黃哂, 左排仲係綠...

補褲

前幾晚, 隻佬發現佢條單車褲甩線, 話要攞出去俾人補..

我: 睇過...(我攞起條褲睇) hei, 駛咩攞俾人補丫, 等我黎

佬: 你??

我: 容咩易呀, 好簡單之嘛~

我相信佢聽到我呢句已經標緊冷汗, 係, 我成日都咁講, 特別係人地煮既野佢覺得好味, 我都會講: 容咩易呀, 好簡單之嘛~ 等我煮俾你食啦~

但係無一次成功, 次次都難食到嘔, 佢次次食過一啖之後都話: 你以後唔好煮喇~

佢仲會話: 你以後唔好煮新野喇~

就係咁, 佢對我煮餸呢一範係完全無信心...

但係呢, 每當佢出面食親好味既野, 我都會咁講, 個傻佬又每次肯俾我試, 但係又每次都...

所以當我話要幫佢補褲, 佢真係猶豫左一陣, 好唔情願咁講,

佬: 你好聲d補呀, 唔好越補越爛呀~

我唸當時佢肯俾我補, 已經打定輸數, 最壞打算就係買過條新既...

我呢...仲未講佢知最嚇人o個句佢聽, 就係我讀書時學過家政架, 不過肥佬之嘛~

好, 今次要做得好好睇睇, 真係...其實我都好怕補衫, 我都唔係好信自己, 更何況佢呢~

但係, 係有奇蹟架, 佢返黎我俾佢睇, 佢仲問我補左邊度??!!

哈哈, 我都覺得好完美, 好神奇, yeah~!

紅葉前既首爾大公園

Date: 9 Oct 2013 (Wed)

韓文日公眾假期, 之前本來 plan 去春川踩單車, 但係隻佬話前一個禮拜先去過, 不如去華川踩啦, 但係我唸唸下又嫌遠, 不如去picnic + 踩單車啦, 點知前一日又落雨, 驚草地未乾, 最終還原基本步, 去動物園...又係動物園...

我地今次行左另一條路, 嘩, 呢度如果變左紅葉一定好靚~

又係勁塞車, 開始有少少少少紅葉~

睇完時間尚早, 我就話不如去超市啦..

佬: 又去? 又去洗錢呀?
我: 咁唔通去邊呀? 行下啦~
佬: 今次唔准買野呀~!
我: 唔買未唔買, 睇下邊個唔忍得手~

點知, 去到佢已經話要去睇野食, 轉個彎啫, 佢就攞起盒林柿..

我: 你做咩呀?
佬: 林柿好大個喎呵??!!
我: 咁又點呀? 你又話唔好買野既~~??
佬: 多事.. (好自然咁已經擺左落架推車喇)

就係咁, 佢開左個頭, 我無理由唔埋尾架? 係未??

2013 首爾國際煙花節

食完飯, 就由一山出番市區, 不過勁塞車, 都已經唸住搵唔到位, 所以都係抱住睇到就睇, 睇唔到返屋企~

我地行左去world cup 附近條橋, 都有位泊車, 都睇到煙花, 不過好遠囉, 隻佬就話怕完既時候勁勁勁塞車, 不如開車走, 一路喺車裡面睇, 話唔定塞車塞左個靚位置, 睇得仲清楚添~

其實我好易滿足架, 雖然遠d, 但係我都當睇左, 走得人架喇~

開車走時, 嘩...人多到~

就係咁, 一路行車一路睇...



不過真係d車多到都唔郁既, 最後要運路走, 終於由一山返屋企既路程, 用左3個幾鐘...真係...個時間都返到鄉下囉~

韓國大發現



哈~ 喺韓國, 大部份 '你冚旗' 既醬料都有得賣, 但係今次我先第一次見有腐乳 & 辣油賣咋, 不過係大陸出既, 緊係唔敢買啦, 點知係未假腐乳, 又或者係用咩工業腌料架?! 都係見過興奮一下算喇~



好早食既晚餐

睇完花展, 因為想去睇煙花, 所以就喺埋呢邊食個晚飯, 5點食晚飯都係第一次, 無咩o岩食 (實情係無咩o岩佢食時我又o岩食), 2條友喺人地門口行黎行去, 似想打劫人地多d, 食好唔食好呢?! 無得揀, 就入去食魷魚拌飯喇, 魷魚少得可憐, 得幾條腳毛仔, 我d眼睫毛仲多過佢...



高陽秋之花展

Date: 5 Oct 2013 (Sat)

呢日有兩個地方要去, 第一, 就係花展; 第二就係國際煙花展

塞左好耐先到, 去到又好鬼曬, 都無咩心機影相...

補祝生日??

Date: 30 Sep 2013 (Mon)

呢日約左설아出黎, 我地約喺江南站等, 先去食個 lunch, 不過無幾間可以揀, 就清清地食日式喇~ 

 食完指定動作, coffee & cake...
去到間餅店時, 門口寫住 cake 半價, 攪到我雙眼發光, 咁筍? 真係唔係好信~
就入去睇, oh~ 真係, 我地揀左cream cake, 2個人居然食哂~
傾下食下坐下, 又無咩人, 咁快又 1 day~

喺韓國食正宗香港點心??

哈哈, 其實係多得阿爹阿娘轉登帶俾我, 我先可以過下飲茶癮, 其實仲有蝦餃燒賣, 鳳爪排骨飯架, 不過唔記得影低...正正~~!!

濟州黑豬肉

是日係最後一日既全日活動, 又係我既生日, 無咩行程喇, 主要係帶佢地去超市作最後衝刺, 買手信, 話咁快又一日, 夜晚去食濟州黑豬肉.
因為阿爹阿娘帶左勁多野俾我, 所以今年我係無買生日蛋糕既, 因為雪櫃多野到連擺隻雞蛋都無位, 唯有食完飯去食雪糕啦~ 都好滿足架喇~





바지락 칼국수 + 만두



去完outlet, 係時候回程食晚飯, 去左食阿爹阿娘鐘意食既'蜆麵', 仲叫多2盤韭菜餃添~

我反而覺得韭菜餃好食, 見到又想食~

양떼목장 (大關嶺牧場)

Date: 22 Sep (Sun)

呢日係中秋5日假期既最後一日, 好多人都會返黎首爾, 因為驚塞車, 所以好早就出門口, 不過好彩, 來回都無塞車, 3個鐘頭車左右, 12點就去到喇..

買入場票先, 65歲以上半價, 佢地又唔check 身份證 passport 咁, 講個 '信' 字.

呢日好大霧呀, 又唔知海拔幾高咁, 所以就算夏天黎都要帶外套...