俾佢激死!!

條友都唔知做咩, 成日唔係唔見野呢, 就係漏低野, 佢呀, 今日仲精彩呀...!!!

話說佢夜晚返到屋企...

佬: 哎呀, 部ipad 漏左喺公司, 唔記得拎返黎添~

我: 咁未唔好用囉, 仲好, 今晚早d瞓..

到佢食完宵夜, 坐左幾個字...

佬: 弊, 部ipad 好似漏左喺間餐廳...

於是佢就即刻去間餐廳搵喇~

又十幾分鐘後, 佢打俾我...

佬: 你搵下屋企有無...??

我: 無喎~

佬: 咁我有無拎過出街呢??

我: 我鬼知你呀??!! 

於是佢又收線, 又周圍搵喇~

過左一陣佢返黎, 見佢拎住部ipad, 但係我見佢塊面呢...係咁既色 --

我: 你邊度搵番架?

佬: 車裡面...但係我頭先仲走去間餐廳話個阿豬嘜...話我部ipad 明明擺喺張檯到, 問佢點解會睇唔到~

係囉, 個阿豬嘜無端端俾你省到一面屁, 你以後都唔駛去幫襯人地喇, 你個頭又咁易認...俾我?? 見你黎一次就加你料一次...我仲無辜, 俾佢連累到都無得食添~

超人老媽子老豆黎過節

Date: 20-24 Sep 2013 (Fri-Tue)

點解叫超人? 未就係佢地發揮能人所不能(起碼我拎唔到) 既極限, 拎左勁多野過黎俾我囉~

多到...相都影唔到咁多, 唯有數出黎: 點心唔少得, 蝦餃燒賣鳳爪糯米雞叉燒包, 卥水鴨翼, 白切雞, 芋頭炆鴨, 叉燒, 支竹腐竹, 麵包蛋糕, 蛋卷餅乾, 麥皮果仁紅莓藍苺, 月餅, 冰糖, 麵, 羽絨, 朱古力椰子糖, 哎呀, 都唔記得咁多, total 唔知有無60kg, 仲有袋衫&月餅因為無位, 本來叫細細妹拎埋, 點知佢突然調更黎唔到~咁唯有我地4個人過節; 順便同我慶生喇~

第一日無行程, 返到屋企執好行李, 一陣間又到時候出去食飯喇, 老媽子鐘意食buffet, 咁緊係要帶佢去啦~ 食完返屋企, 早d抖, 第2日要一早起身.

第2日朝早7點起身, 唸住帶佢地去大關嶺牧場, 點知老豆話香港打風, 驚香港機場會亂返唔到去, 話要即日走喎~  我都講唔掂佢, 唯有搵細細妹睇下幫唔幫到佢改機票喇~ 最經典係佢話如果改唔到, 自己出機場排隊喎~ 點知我地幾個又不孝, 又無義氣既女, 都唔肯伸出 '同情之手', 細細妹仲講笑話不如淨係改老豆張機票, 叫佢自己返香港先, 老媽子繼續留喺韓國玩, 無人出手, 老豆唯有繼續 '滯留' 韓國~ 

 

就係咁, 老豆自編自導, 仲要自己做埋主腳既呢場戲, 攪到10點幾先叫cut. 牧場?! 已經去唔切, 唯有即刻搵其他地方, 遠既唔敢去, 因為驚塞大車, 近近地去 물향기수목원 (樹木園) & 水原華城行宮啦~

찜닭 (韓式燉雞)



9月18-22, 一連5日既中秋假期開始~

18日留喺屋企洗屋, 19日夜晚出左去食飯, 都唔知想食咩, 出左去先算, 最後就去左食燉雞, 味道唔錯~

自得其樂 Homeplus shopping 記

Date: 14 Sep 2013 (Sat)

呢日無節目, 唯一既就係去 Homeplus 買野, 我都知今次會行好耐, 所以我自己去超市, 叫隻佬咁上下時間黎接我, 費事又俾隻大烏蠅'嬲'住, 左催加催...

我發覺自己都幾癲, 一個人都可以行成2個幾鐘, 如果唔係隻佬催我, 分分鐘行到幫人拉埋閘先走

行到成8點8, 去俾錢, 話說我買左3個玻璃煲蓋俾老媽子, 過唔到機, 原來係佢地無'做手腳', 電腦讀唔到個barcode, 要我地等10分鐘, 無法啦, 一定要買, 個阿豬嘜就送左盒lotion 俾我地, 等左好耐終於攪掂...

去食飯時..

佬: 我係未好靚仔呀?

我: 做咩呀?

佬: 頭先個呀豬嘜俾番張單我時, 佢2隻手猛咁捉住我隻手唔放, 係咁講唔好意思~

我: (好彩未食飯...) 點丫? 你以為我會嬲? 定係想講有人睇中你? 傻啦~ 你今晚唔好洗手添呀~

攪左一輪, 都返唔切屋企附近食飯, 唯有上去上面既food court 攪掂...

隻佬呢排轉性, 鐘意食呢d...

  

我呢~唔知點解同佢調轉左, 要食正餐...叫左個뚝배기 불고기(牛肉飯), 我幾鐘意食架, 撈飯好食, 個餐仲包埋蒸蛋添~ 



煎鵪鶉蛋鵪鶉蛋

喺香港細個時間唔中都會食下鵪鶉蛋, 但係大左, 唔知係少有得賣, 定係老媽子無買啦..都無食過lu~ 反而係黎左韓國先見番, 不過鵪鶉蛋膽固醇高, 所以都好少好少食...

有日手痕痕, 烚既就食得多喇, 唔知煎既係咩味呢? 咁就煎左1隻試下...hmm..都係烚既好食d, 重蛋味...

久違的宵夜 - 芝士年糕 (치즈 떡볶이)

屋企樓下開左間24小時既小食店, 整D野都幾好食架, 我地耐唔耐都會幫襯下~

呢晚隻佬我以為佢約左人吹水, 咁我瞓先啦, 點知佢打黎問我做緊咩, 做咩咁早瞓覺, 佢話買左年糕返緊黎~

嘩, 好耐無食, 即刻彈起身, 開番燈等佢...D年糕喇~

街邊賣既年糕我係唔食架, 唯獨是呢間整既我先會食, 好好食~

餃子湯

 Date: 30 Aug 2013 (Fri)



呢日約左설아去飯堂 - Ashley食, 真係...對我地黎講, 2個鐘係唔夠既...wahaha

食完就去左東大門陪佢買布, 嘩, 唔睇都唔知, 大開眼界, 好多好多款布, 攪到我都想自己整番件衫...不過都係唔好唸喇, 以我既'手藝', 衫袖都整唔成型, 整左條口水肩出黎都似, 係呀, 四四方方, 四邊聯線, 容咩易...

大約6點..我地又各自返歸, 要返去交人, 陪隻佬食飯, 佢話想食血腸湯, 但係我仲好飽呀, 唯有叫個餃子, 點知餃子係俾埋飯既, 無計, 唔想嘥野, 都要食啦~

韓國版檸檬綠茶

今晚食豬腳，食完好想飲杯汽水，但係屋企冇存貨，咁唯有出街做運動時順便買喇。點知俾我見到有檸檬綠茶喎。嘩！喺香港時最鐘意飲＂倒地＂既檸檬綠茶嘛，等左咁多年韓國終於都有喇！

不過味道呢始終冇香港好飲，呢隻呢...如果太多檸檬味，綠茶味就冇定企，等到綠茶味返番黎，檸檬味又唔爭氣...

唉，不過好過冇啦，過下口癮都好既~

入伙大吉

丫烏卜終於要收樓，我就搵左呢個地步，本來唸住擺好哂D家私，睇埋通勝擇個好日先入伙既，不過我又懶懶行，要等我整好哂既話我唸我都揸拐杖咯，所以有理冇理入左伙先啦，遲D先再擺番D舊野。