西瓜奇遇記

突然記起,快快手寫低先...

已經係舊年既事...話說有一晚,去超市入貨,係貨架上見大大個價錢牌 有機米5kg 15,800won,嘩~好抵喎,平時普通既都差唔多呢個價,而家呢包有機,剩返一千零一包,即入...

俾錢過機時,發覺包米個價打左成3萬won,即刻同cashier講,佢話部機係呢個價無錯嫁喇~

唔知D男人係未慣左多一事不如少一事,想算數.仲話係我睇錯價錢牌. 唔得!!!又唔係我錯,明明睇清睇楚先落手.於是俾完錢叫佢企定定等我,我就師奶超人變身,自己去返有機米度再check清楚價錢,真係無睇錯,仲影埋相做證,費時口同鼻拗.

同老公一齊去客服講,個女職員用對講機叫入面D人 check,大家等左好耐,個女職員於是都走入去幫我地check, 又等左一陣,見個女仔出返來,隔離又有個男職員攞住個黃色西瓜一路行一路望住我地,心唸 "弊~人地可能擺緊西瓜上架,怕我地等得耐,心急起上來連個西瓜都放唔切,攞埋出來招呼我地先~"

個女職員同我地解釋一輪,我同我老公對視,要忍住笑...因為佢話係佢地疏忽,所以送返個同等價錢既黃西瓜俾我地,真係爆咀. 我只係唸住退錢,無唸會咁嫁~

走左後問老公,我係未好叻呢,你賺左個西瓜. 佢話:最叻係你喇,好彩有車咋,如果唔係點秤2個西瓜返屋企? (因為我地自己同時又買左個西瓜).

哈哈,咁又係,如果無車,可能佢會答我:多得你唔少呀~