韓國佬 x 香港婆 : 中秋返鄉下

Date: 7~8 Sep 2014 (Sun & Mon)

一連5日既中秋假開始~ 不過我地只得4日...點解? 其實韓國今年先開始有補假呢樣野, 往年係無既, 所以以前全年都係得10日左右假期, 今年就多左好多...但係補假呢, 就唔係法定既, d公司可以揀俾唔俾人放假, 隻佬就揀唔放囉~

好啦, 其實我地近呢幾年既大時大節都好少返鄉下, 因為真係好怕塞車, 而我就怕要洗碗喇, 香港人喺屋企食既話頂多都係8餸1湯加幾隻飯碗, 而家甚至多數出街食添...但係韓國人唔同呀, 唔興出街食, 嘩, 嗰d拌菜, 細細碟細細碟, 仲要每人1個飯碗再加湯碗, 食一餐飯要洗既碗有成半個人咁高真係小意思...我試過要洗成個鐘碗呀...陰公...

6號開始假期, 隻佬就算手指, 邊日返好呢?! 邊日無咁塞車呢?! 於是佢就算到7號星期日朝早9點出門口喇, 點知9點佢個人仲喺張床到, 等呀大少起身起得程成10:30. 不過都算好彩, 去程無咩點塞, 中途食埋午飯總共5個鐘頭到左鄉下.

反而對面去首爾條線就勁塞...

去到先去探奶奶, 探完之後就去食我最鐘意食, 由舊年望到今年既鴨湯喇, 我地去食之前打電話去幫襯開嗰間問會唔會休息, 佢地答唔會, 仲會開到9點添, 於是滿心歡喜出發啦, 點知5:30去到閂左門喎!!! 我心唸會唔會隻佬誤會左人地, 其實人地係答: "開到9點...除左今日." 佢就聽漏左後面嗰4隻字呢? 於是佢又打電話問人地, 點知個老細仲騎呢, 佢答: "呀~係呀, 本來係開到9點, 但係臨時決定收早呀..."

於是隻佬就叫佢介紹邊間好食, 個老細就介紹左一間, 咁o岩我又唸住去呢間, 於是就入左去喇...

好野好野, 終於食到喇~

呢個醋醬用黎點水芹 & 鴨食...

食完, 我呢個小食神都要俾下意見既, 個湯係好飲, d鴨仲嫰過食開嗰間添, 但係個湯無鴨味, 佢地應該分開煮, 食開間就好有鴨味, 只不過係咸d啫, 總括黎講, 都係去返食開嗰間~

食完做運動...行超市..

見到美祿呀, 不過我咁大個女都好似只係飲過1,2次, 無咩特別喜好...

行完就返去二佰屋企瞓喇~ 等我仲拎埋床單被舖一心唸住喺奶奶間屋瞓架麻...但係隻佬就 '驚我悶, 驚我無野做', 就話去佢二哥屋企瞓, 仲幫我安排好第2日既節目添...

第2日6點幾晨咁早起身, 開始我既節目, 就係幫手整過節既野喇...好彩我唔識煮餸, 所以我只係洗下豆芽, 洗下蟹, 煎下餅咁啫...哈哈~ 好多野阿嫂前一晚已經整定, 所以都唔多野做. D男人? 瞓既(我隻佬)繼續瞓, 一係就坐喺度(佢D阿哥)睇電視...不過我都係第1次聽到呀嫂話佢地: "做咩坐哂喺度睇電視? 幫手set檯啦~"

食完洗完, 就一班人一齊去探奶奶喇, 探完就去隻佬個呀叔屋企, 唔知點解往年都無咩點去, 今年又會去...
仲要係唔知點解往年呢條鄉村揾架車都無, 今年就泊左咁多車...

坐到差唔多12:30, 終於走得, 我地都拿拿林返首爾屋企喇, 回程好塞...

塞到...連山路都塞埋...點解行山路唔行高速公路? 因為我地部GPS 有個功能就係有埋即時交通狀況, 如果知道原定路線勁塞車, 佢就會自動guide我地行第2條路...
行行下經過一檔賣栗子既阿伯, 見佢手指指, 叫d車行捷徑, 有d車就跟佢, 我地就無...

我: 喂, 佢叫d車行嗰度, 做咩唔跟呀?
佬: 佢可能指d車去佢塊地到買栗子呢...